rah-e-junun mein khuda ka hawala kya karta
ye khizr ranj-e-safar ka izala kya karta

guzarni thi tere hijr ki pahad si raat
main tar-e-resham-o-zar ka do-shaala kya karta

na shaghl-e-khara-tarashi na karobar-e-junun
main koh-o-dasht mein faryaad-o-nala kya karta

hikayat-e-gham-e-duniya ko chahiye daftar
waraq waraq mere dil ka risala kya karta

main tishna kaam tere mai-kade se laut aaya
kisi ke nam ka le kar pyala kya karta