rahega yaad tu jab tak hayat baqi hai
ki teri yaadon ki ek kaenat baqi hai

guzar raha hai ye be-rang zindagi ka safar
na din hi baqi raha hai na raat baqi hai

tumhaari yaad ke raushan charagh har su hain
shab-e-firaq se milni najat baqi hai

abhi na bazm-e-sukhan se uthaiye mujh ko
kisi nazar ka abhi iltifat baqi hai

na kaam aai hamare jo karbala mein kabhi
bala se apni jo mauj-e-furaat baqi hai

tamam umr chale ishq ki dagar 'mukhtar'
magar safar mein abhi pul-siraat baqi hai