rahin-e-dast-e-azar ho gaya hun
main aaina tha patthar ho gaya hun

mera to kaam qatre se bhi chalta
teri khatir samundar ho gaya hun

jo baatin hai wahi zahir hai mera
kuchh aisa saf manzar ho gaya hun

kai jahton se hai yalghaar mujh par
tan-e-tanha main lashkar ho gaya hun

chale hain sath hi ghar ke masail
kabhi jab ghar se bahar ho gaya hun

raha hai naz jin ko apne qad par
khada un ke barabar ho gaya hun

mujhe taslim hai ye 'shan' sahib
sukhan-sazi ka daftar ho gaya hun