ramz-e-hayat aalam-e-fani mein kho gaya
mera wajud naql-e-makani mein kho gaya

kya jaane kya kashish thi tumhaare kalam mein
jis ne suna wo lafz-o-maani mein kho gaya

jo dur tak nahin the wahi ab hain samne
kirdar mera us ki kahani mein kho gaya

dariya se bhi kahin koi sailab jab utha
wo bhi in aansuon ki rawani mein kho gaya

jo kuchh kaha nazar ne nazar se sune wo kaun
har shakhs guftugu-e-lisani mein kho gaya

duniya-e-ilm-o-fan mein jo hasil tha kal use
sara kamal charb-zabani mein kho gaya

ehsas phir zaifi mein 'rahbar' hua unhen
lutf-e-hayat jin ka jawani mein kho gaya