rang aahang-e-haal se pahle
wo he khushbu khayal se pahle

us ne kaghaz pe khinch kar yaro
hijr likkha visal se pahle

bhid mein chup khada tha diwana
chikh uttha dhamal se pahle

shaikh mahshar mein kanpta bhage
sud khata tha mal se pahle

dekh kursi pe saf likkha hai
rahm hai han jalal se pahle

mujh pe tari shabab tha yaro
main tha ladka zawal se pahle

karb mein dar-ba-dar bhatakta tha
tifl-e-maktab kamal se pahle

hai wo paikar 'murad' ke andar
ruh mein khadd-o-khal se pahle