rang ab yun teri taswir mein bharta jaun
tujh pe rang aae main jaan se bhi guzarta jaun

wo diya hun ki hawaon se bhi darta jaun
fart-e-pindar se phir raqs bhi karta jaun

ajab aashob diya mere khuda ne mujh ko
ek tamanna-e-masihai mein marta jaun

mujh ko jhutlati rahin wo meri munkir aanhken
aur main surat-e-khurshid ubharta jaun

mere chehre pe na jao ki mera husn hai ye
apne likkhe hue lafzon mein nikharta jaun

aisi tanhai ka aalam hai ki har shakhs ke pas
ek pazirai ki hasrat mein thaharta jaun

'shauq' shaer bhi hun andesha-e-jaan bhi hai mujhe
ruh mein shor karun lafz mein darta jaun