rangon se thande pani ke chashme bana diye
kaghaz pe saya-dar shajar bhi laga diye

launga ab kahan se nazare ki tab main
us ne to meri aankh se parde hata diye

bagh-e-huruf-o-gulshan-e-mani mein dekhna
kis ne ye khamushi ke nae gul khila diye

chhote se abr pare ne aa ke sar-e-falak
ahl-e-nazar ko din dhale paigham kya diye

bas hum to ek chhoti si zid pe ade rahe
dastar ko bachane mein sar hi kata diye

aankhon mein rah gae hain faqat aas ke sarab
dariya wo yas ke the jo un mein baha diye

din ko safar kuchh aur bhi aasan ho gaya
raaton ko sabz khwab ye kis ne dikha diye

tartib se liye hain tumhaare tamam nam
ek aur hi falak pe sitare saja diye

tufan ka rup dhaar liya tez sans ne
itna ki khwab-gah ke parde hila diye