ranj ho ya koi khushi apni
tujh se wabasta zindagi apni

nam tera wazifa-e-dil-o-jaan
pyar tera hai bandagi apni

dil ka rishta atut rishta hai
nisbaten tujh se daimi apni

dil laga kar kisi se dekh liya
rang lai hai dil-lagi apni

us nazar ka ajib afsun tha
zindagi jis mein kho gai apni

sun to lije fasana-e-gham-e-dil
rok lije zara hansi apni

un ko dekha to ye laga hai 'nasim'
aaj dil ki kali khili apni