raqs-e-hasti ke phisal jaane ka andesha hai
bagh hathon se nikal jaane ka andesha hai

ab to wo sur bhi lagta hai hamara mutrib
rag jis sur pe badal jaane ka andesha hai

raat ko khauf mera chand koi chhin na le
chand ko raat ke dhal jaane ka andesha hai

bund bhar tel bacha hai to diya gul kar do
warna basti ke bhi jal jaane ka andesha hai

us ka apna koi aa jaega le jaega
aaj ruk jae to kal jaane ka andesha hai

is zamin par bhi laga lenge koi ped ustad
hath se ye bhi ghazal jaane ka andesha hai