raushni chashm-e-kharidar mein aati hi nahin
kuchh kami raunaq-e-bazar mein aati hi nahin

us se kuchh aisa talluq hai ki shiddat jis ki
kisi pairaya-e-izhaar mein aati hi nahin

jo nahin hota bahut hoti hai shohrat us ki
jo guzarti hai wo ashaar mein aati hi nahin

sakht hairan hun salahiyyat-e-khaibar-shikni
waris-e-haidar-e-karrar mein aati hi nahin

tum ne dekhi hai ajab kaifiyat-e-chashm 'siraj'
baat wo nargis-e-bimar mein aati hi nahin