raushni ho na saki sham ke hangam ke sath
aur hum dip jalate rahe har sham ke sath

dur badhta hi gaya hasrat-e-nakaam ke sath
dil mein ek tis uthi aap ke hangam ke sath

aap ne pursish-e-gham ka bhi takalluf na kiya
dil mein hum jalte rahe hasrat-e-nakaam ke sath

jaane kyun aaj mere ishq ki tashhir hui
har zaban par hai mera nam tere nam ke sath

daur-e-mai khatm hua shama ka dil baith gaya
raunaq-e-bazm gai saqi-e-gulfam ke sath

waqt ki baat hai kya waqt guzar jaega
aur kuchh der chalo gardish-e-ayyam ke sath

manzil-e-ishq mein kya kaam tha un ka 'hamdam'
thak ke jo baith gae rah mein aaram ke sath