rawayya kafi kuchh badla hua hai aasmanon ka
magar naqsha wahi hai ab ke bhi khali makanon ka

wahi ek qissa ab tak dhyan mein raushan nahin hota
tasalsul jis se wabasta hai pichhli dastanon ka

udhar se bhi kisi aawaz ki aamad nahin mumkin
idhar bhi zawiya badla hua hai apne kanon ka

bahut khush-rang thi parwaz un khamosh banhon ki
jahan bhi hausla darkar tha unchi udanon ka