shanasa jis ko samjhe the wahi na-ashna nikla
wo kaisa yar tha jo yar ban kar bewafa nikla

bhatakta chhod aae the jise hum dur sahra mein
hazaron qafilon ke darmiyan wo qafila nikla

ulat kar jab bhi dekhi hai kitab-e-zindagi hum ne
to har ek lafz ke pichhe koi ek hadisa nikla

bahut kuchh naz tha hum ko magar ab kya kahen yaro
hujum-e-dostan mein wo akela bewafa nikla

ki apne dukh-bhare naghme tumhein kaise suna pate
hamare hath jo bhi saz aaya be-sada nikla