rawish-e-asr se inkar bahut mushkil hai
karb-e-ehsas ka izhaar bahut mushkil hai

wo ye kahte hain ki main bolun hun aawaz un ki
uf ye majburi-e-guftar bahut mushkil hai

hum se diwane kahan tab-o-tapish se thahre
dhundh len saya-e-diwar bahut mushkil hai

mera dushman mere andar hi chhupa hai aur main
khud se hun bar-sar-e-paikar bahut mushkil hai

aah karne ki ijazat nahin is shahr mein ab
aur ek ye dil-e-bimar bahut mushkil hai