ret par mujh ko guman pani ka tha
sabr mera imtihan pani ka tha

sab junun-o-azm kaghaz kashtiyan
samna jab be-karan pani ka tha

sang-e-sahra mein thi dariya ki numud
sang-e-sahra mein ziyan pani ka tha

yun mili sailab mein ja-e-panah
sar pe mere saeban pani ka tha

aag bhi barsi darakhton par wahin
kal basti mein jahan pani ka tha

ek sunahri fakhta thi par-kusha
jab ye be-samt aasman pani ka tha