riwayaton ke abhi aaftab baqi hain
sharafaton ke abhi mahtab baqi hain

ye mana hum ne ki aazad ho chuke lekin
abhi ghulami ke hum par azab baqi hain

unhi ke dam se hai raunaq yahi hain sarmaya
bikherte hue khushbu gulab baqi hain

ye tarjuman-e-hayat-e-bashar hain dekho to
ubharte phutte ab bhi habab baqi hain

haqiqaton se jo parda utha hua malum
ba-nam-e-dost abhi tak sarab baqi hain