roz murgha bana kare koi
kab tak aakhir pita kare koi

jab kahin naukri nahin milti
degreeyan le ke kya kare koi

mujh ko reading se sakht nafrat hai
main sunun aur padha kare koi

jis mein aati ho bu tassub ki
aisi tarikh kya kare koi

jin mein jang-o-jadal ke qisse hon
wo kutub kyon padha kare koi

ghair-mulki zaban english ko
khwa-makhwah kyon rata kare koi

nahin ummid-e-kaamyabi jab
imtihan de ke kya kare koi

khub insaf hai ki darje mein
main pitun aur khata kare koi

kab tak aakhir baghair samjhe hue
formule rata kare koi

'kaif' aata nahin jawab-e-khuda
khat kahan tak likha kare koi