ru-ba-ru tere bahut der bithaya gaya main
wajd mein aaya nahin wajd mein laya gaya main

silsila khatm na hoga ye dil-azari ka
is se pahle bhi kai bar manaya gaya main

yun laga sab ne gawahi di ki tu mera hai
jab tere nam se basti mein sataya gaya main

jab jab asrar meri zat ke khulne se rahe
chhed kar zikr tera wajd mein laya gaya main

mujh se raste mein thaharne ki aziyyat puchho
thokaren mar ke raste se hataya gaya main