ru-e-zeba nazar nahin aata
apna jina nazar nahin aata

laf-e-ulfat bahut zamane mein
marne wala nazar nahin aata

dard-e-dil ki dawa hai jis ki nazar
wo masiha nazar nahin aata

gul-o-gulshan se kya tasalli ho
gul-e-rana nazar nahin aata

phul bute bahut hain gulshan mein
sarw-e-baala nazar nahin aata

tab-e-mawwaj ke muqabil ho
aisa dariya nazar nahin aata

jis pe mit jaane ki tamanna hai
wo sarapa nazar nahin aata

chhan dala jahan us ke liye
nahin aata nazar nahin aata

jis mein wahshat ke hausle niklen
aisa sahra nazar nahin aata

thak gai tare ginte ginte nigah
mah-sima nazar nahin aata

jis mein surat-numa ho naqsh-e-murad
aisa naqsha nazar nahin aata

lakhon jalwa nazar mein hain 'hasrat'
jalwa-farma nazar nahin aata