rukh zulf mein be-naqab dekha
main tira-shab aaftab dekha

mahrum hai nama-dar-e-duniya
pani se tahi habab dekha

surkhi se tere labon ki hum ne
aatish ko miyan-e-ab dekha

qasid ka sar aaya us gali se
name ka mere jawab dekha

jaana ye hum ne wafat ke baad
dekha jo jahan mein khwab dekha

aafat ka nishana ho chuka tha
main dil ki taraf shitab dekha

ek waza nahin mizaj-e-mashuq
gah lutf o gahe itab dekha

aankhon se bahaaren guzrin kya kya
kis kis ka na main shabab dekha

kal mai-kade mein baghair saqi
aundha qadah-e-sharab dekha

kin us ne jafaen be-hisabi
ek din na kabhu hisab dekha

sine se nikal pada na aakhir
dil ka mere iztirab dekha

kya hogi falah baad-e-murdan
jite to sada azab dekha

aabaadi hai us ki 'mushafi' kam
aalam ke tain kharab dekha