sab ko khud se bacha raha hun main
apna naqsha mita raha hun main

dil ka tere hua main jaan-e-jaan
purza purza uda raha hun main

ya sajata hun teri doli ya
apni mayyat saja raha hun main

taki phir sher ka dhamaka ho
roz barud kha raha hun main

dil ke main ne badhae dam bahut
jaan sasti bana raha hun main

dhong hai ye meri nai ulfat
ab bhi wada nibha raha hun main

baat manhus ek sunane ko
pahle achchhi suna raha hun main

id diwali ho ki baisakhi
jashn-e-urdu mana raha hun main

tang aaya hata ke kanton ko
ab to rasta hata raha hun main

ab to dete nahin ghulami bhi
dur tha ek khuda raha hun main

aag lagne ki chah se hi to
shama ghar mein jala raha hun main

ab tera zahar phaile bahar bhi
ab to 'maghlub' ja raha hun main