sabhi se in dinon rutha hua sa lagta hun
main apne aap ko ab bewafa sa lagta hun

tamam raat main girti hui haweli mein
dilon se nikli hui baddua sa lagta hun

main wo khazana hun haqdar jis ki duniya hai
hazar hisson mein banta hua sa lagta hun

meri talash ba-dastur ab bhi jari hai
wo mil gaya hai main khoya hua sa lagta hun

meri hansi se udasi ke phul khilte hain
main sab ke sath hun lekin juda sa lagta hun

chamak raha tha ye chehra kisi ki aankhon mein
main aaine mein koi dusra sa lagta hun

tamam raat barasti hai ret par shabnam
main apne chand se jab bhi khafa sa lagta hun