sachche dil se wada kiya ho aisa bhi to ho sakta hai
us ka kya hai bhul gaya ho aisa bhi to ho sakta hai

fitna-gar ka rup naya ho aisa bhi to ho sakta hai
mujh se mil kar us se mila ho aisa bhi to ho sakta hai

ishq mohabbat lag lagawat shayad is mein kuchh bhi na ho
sirf tumhein mahsus hua ho aisa bhi to ho sakta hai

aap mere qatil kyun-kar hon jhut kisi ne udaya hoga
aap ka chehra us jaisa ho aisa bhi to ho sakta hai

ahl-e-basirat dhoka kha kar ghair ki baaton mein aae hon
ghar ka bhedi koi raha ho aisa bhi to ho sakta hai

pahle bhi abna-e-watan ne becha hai namus-e-watan ko
waqt ne khud ko dohraya ho aisa bhi to ho sakta hai

zoam-e-hukumat ne thukraya rahbar-e-din ki dawat-e-haq ko
us ka ye anjam hua ho aisa bhi to ho sakta hai

dil to aakhir dil hai yaran kab tak un ke roke rukta
pakka phoda phut baha ho aisa bhi to ho sakta hai

khatm-e-safar par ahl-e-masafat itne kyun mayus hue ho
is manzil se safar naya ho aisa bhi to ho sakta hai