sada-e-rahguzar ko taras gaya hun main
tumhaare sath safar ko taras gaya hun mein

na jaane kya hui mujh se kisi ki haq-talfi
laga ke ped samar ko taras gaya hun main

shajar pe baithe parinde uda diye the kabhi
ab apne ghar mein bhi ghar ko taras gaya hun main

haram rozi ka luqma chaba liya tha kabhi
duaen kar ke asar ko taras gaya hun main

utha jo sar se mere waldain ka saya
to ek shafiq nazar ko taras gaya hun main

mere nasib ko tarikiyon ne gher liya
wo shab mili ki sahar ko taras gaya hun main

zamin ke chand ka didar kya hua 'shaida'
to aasman ke qamar ko taras gaya hun main