sadiyon se shab-o-roz yahi soch raha hun
main kaun khuda kaun hai main bhul gaya hun

aise mein umangen hi zara saz uthaen
dahliz pe phir se main iradon ki khada hun

har chand bhatakna pada bazar mein barson
har shakl ki taswir magar khinch chuka hun

aae na yaqin aae kisi aur ko mujh par
sahra-e-khamoshi mein bahut der phira hun

'arij' kabhi utra hun andheron ke jigar mein
suraj ke samundar mein kabhi gharq hua hun