sadiyon se tha jo darpae-azar gir gaya
apna adu wo ghazi-e-guftar gir gaya

kapdon ki qaid se hua aazad us ka jism
wo shakhs jis ghadi sar-e-bazar gir gaya

jab surkhiyon pe apni nigahen thahar gain
hathon se apne aaj ka akhbar gir gaya

be-khwab rah ke sab ko wo karta tha faizyab
jab so gaya to saya-e-diwar gir gaya

wo zalzala tha ya ki qayamat ka silsila
sanson ke sabz-shahr ka minar gir gaya

mayusiyon ki fauj ne hamle kiye bahut
lamhon ke ran mein rahbar-e-kirdar gir gaya