sadma har-chand tere jaur se jaan par aaya
tis pe shikwa na kabhi meri zaban par aaya

rast-keshon ki tuf-e-ah se dar ai sarkash
tir phirta nahin jis waqt nishan par aaya

mausam-e-sheb mein be-faeda hai lab-e-shabab
kab samar dewe hai jo nakhl khizan par aaya

dil-e-pur-khun ko mere ghuncha-e-taswir ki tarah
lab-e-washud na kabhi raaz-e-nihan par aaya

chashm-e-anjum pe nahin abr se wo roz-e-siyah
jo mere dida-e-khun-nab-chakan par aaya

raat ko dekh ke ai mah tujhe ghair ke sath
tana-zan dil ka mere gul ke katan par aaya

ho ke ustad dabistan-e-sukhan mein 'sauda'
sher ke qaeda danan-e-jahan par aaya