safar aur dhup ka jangal ilahi
koi saya koi baadal ilahi

meri sochen mere afkar zakhmi
mere harf-o-sada ghayal ilahi

musalsal aandhiyan aur mere dil mein
tere iqan ki mashal ilahi

ye aahon aur karahon se bhara aaj
ye andeshon mein duba kal ilahi

dimaghon mein dhuan baaton mein barud
koi aasudgi ka pal ilahi

hazaron bastiyan hain mahw-e-fariyaad
koi in masalon ka hal ilahi