sahifa padh raha hun bebasi ka
taaqub kar raha hun tirgi ka

utho yaro jahan-e-kun-fakan mein
badhaen aur rutba aadmi ka

mere sar ko rakho shane pe kuchh der
ho kam dauraniya aashuftagi ka

tumhaari samt kaise laut aaun
irada hi nahin hai wapsi ka

hamare bakht mein likkha nahin hai
koi lamha zamane ne khushi ka

ye kaisi khwahish-e-nakaam hai jo
mujhe hone nahin deti kisi ka

'adan' aasab par tari junun ko
banana masala mat zindagi ka