sahil se utha hai na samundar se utha hai
jo shor meri zat ke andar se utha hai

dariya-e-mohabbat ke kinare kabhi koi
duba hai jo ek bar muqaddar se utha hai

wo aae to is khwab ko tabir milegi
jo khwab-e-jazira mere sagar se utha hai

main apne rag-o-pai mein use dhund rahi hun
jo shakhs abhi mere barabar se utha hai

raqsan hai meri aankh mein ehsas ki manind
manzar jo teri aankh ke manzar se utha hai

phulon ko tere rang ne bakhshi hai kahani
khushbu ka fasana tere paikar se utha hai

is shahr-e-mohabbat mein wo rukta hi nahin hai
jo shor tere pyar ke mehwar se utha hai

ye us ka rawayya ye ana ye lab-o-lahja
in sab ke sabab amn-o-sukun ghar se utha hai

mehr-o-mah-o-anjum mein use dhundne walo
ye sara jahan khak ke paikar se utha hai

rahta hai meri aankh mein kajal ki tarah se
jo dur tamannaon ke tewar se utha hai

main dar se tere uth ke isi soch mein gum hun
kya koi khushi se bhi tere dar se utha hai

jo us ki nazar se kabhi 'afroz' utha tha
is bar wo mahshar mere andar se utha hai