sail-e-bala-e-gham na puchh kitne gharaunde dah gae
naw to khair naw thi sath kinare bah gae

dil mein hujum-e-shauq tha lab pe na baat aa saki
abr falak pe khul gae bij zamin pe rah gae

kis mein thi tab-e-zakhm-e-shauq kis mein tha gham ka hausla
hum hi ye dukh utha gae hum hi ye dard sah gae

ham-safaran-e-shauq ne rah mein haar man li
dasht-e-shab-e-firaq mein hum hi akele rah gae

'mohsin'-e-be-nawa ko bhi dad-e-kamal dijiye
wo bhi hadis-e-dard-e-jaan apni ghazal mein kah gae