sakit hai badan khwab ki lazzat se guzar kar
hairat mein hai dil kucha-e-hairat se guzar kar

ek nakhl-e-shanasai mein rukna pada ta-der
paya use phir dasht-e-wazahat se guzar kar

shamshir dua karke musalle se uthai
phir jang pe nikla main ibaadat se guzar kar

ek zakhm ke andar bhi to hota hai kahin zakhm
bharta jo nahin kar-e-jarahat se guzar kar

ek qaid-e-musalsal hai ki har din meri tanhai
kamre mein chali aati hai khilqat se guzar kar

dushman ke taaqub mein thi mushkil badi darpesh
jaana tha mujhe mal-e-ghanimat se guzar kar

manzar pas-e-manzar mein chhupa hai kahin uryan
taswir mein parde ki riayat se guzar kar

main nind mein chal kar hi utha launga mahtab
is khwab ki bosida imarat se guzar kar

tha kar-e-zarurat bhi giran kar-e-junun par
malum hua ranj-e-maishat se guzar kar

main der se pahuncha tha so baalon mein laga phul
murjha hi gaya lams ki hasrat se guzar kar

us shokh se nadim hai meri taqat-e-guftar
har lafz ada hota hai luknat se guzar kar