samajh ke farz kabhi din ko raat mat karna
guzarte lamhon se taqsim zat mat karna

bacha kar tez hawa mein bikharna padta hai
ana ko nazar gham-e-hadsat mat karna

na jaane kaun kahan kya sawal kar baithe
ghubar-e-rahguzar apne sath mat karna

sametna na sar-e-rah khwab ki kirchen
lahu-luhan kabhi apne hath mat karna

nahin gunah kisi shai ki aarzu lekin
is aarzu ko gham-e-kaenat mat karna

hain darmiyan mein abhi fasle usulon ke
qarib aa ke abhi mujh se baat mat karna

zawal-e-zat to 'parwaz' sab ki qismat hai
yaqin-e-dil ko magar be-sabaat mat karna