samay se pahle bhale zindagi ki sham aae
kisi tarah to udasi ka ghaw bhar jae

hum ab udas nahin sar-ba-sar udasi hain
hamein charagh nahin raushni kaha jae

jo sher samjhe mujhe dad-wad deta rahe
gale lagae jise gham samajh mein aa jae

kisi ke hansne se raushan hui thi baad-e-saba
koi udas hua to gulab murjhae

ye ek dukh jo daba rah gaya hai aankhon mein
wo ek misra jise sher kar nahin pae