samundaron ko uthae phiri ghata barson
magar main pyas na apni bichha saka barson

bas itna yaad hai tujh se mila tha raste mein
phir apne aap se rahna pada juda barson

main ek umr bhatakta raha hun sahra mein
ki meri khak udati rahi hawa barson

hami ne daman-e-shab ko na hath se chhoda
sahar ke git sunati rahi saba barson

nasim shakh-e-gul-e-tar se kyun ulajhti hai
chaman mein phul agar phir na khil saka barson

tumhi ne rah-e-wafa par qadam rakha na kabhi
charagh ban ke main har mod par jala barson

kiran kiran mujhe parwaz ki nawed hai aaj
raha hun teri fazaon mein par-kusha barson