sanbhaal qalb-o-jigar tegh utha nazar na bacha
tera guman ye ghalat hai ki koi sar na bacha

koi diya koi baadal koi shajar na bacha
hawa chali to koi naqsh-e-motabar na bacha

sanad liye hue parwaz ki fazaon se
main yun zamin pe utra ki koi par na bacha

ba-juz amal koi nisbat na kaam aaegi
khuda ke qahr se to 'nuh' ka pisar na bacha

ajib marka ye wahm-o-eatibar mein tha
usi ki tegh chali aur usi ka sar na bacha