sanbhal dil ki nazuk bahut imtihan hai
mohabbat subuk hai agar sargiran hai

mera haal-e-dil puchhte ho azizo
mera haal-e-dil rang-e-rukh se ayan hai

ilahi mere zabt ki laj rakhna
wo na-mehrban aaj phir mehrban hai

bahaar aa rahi hai dhadakne laga dil
meri samt kyon multafit baghban hai

ek ujdi si nagri mein sunsan sa ghar
ye mera pata hai ye mera nishan hai

mitate rahe wo pukara kiya main
mera aashiyan hai mera aashiyan hai

mere sath duniya ka bartaw 'alim'
ajab waqia hai ajab dastan hai