sang-e-dushnam ko gauhar jaana
hum ne dushman ko bhi dilbar jaana

nang-e-ulfat hi raha parwana
us ko aata hai faqat mar jaana

puchh lena dar-o-diwar ka haal
ai bagulo jo mere ghar jaana

sar qalam karte rahe zulm ke hath
yar logon ne muqaddar jaana

kam-nigahi ne duboya hum ko
ek qatre ko samundar jaana

tesha-bardar ko farhad kaha
aaina-gar ko sikandar jaana

hum haqiqat mein the kohsar magar
khud ko zarron se bhi kam-tar jaana