sans lena bhi bar hota hai
jab tera intizar hota hai

aata hai jab bahaar ka mausam
jab junun ustuwar hota hai

zikr kya daman-o-gareban ka
pairahan tar tar hota hai

aap rone se mana karte hain
rone par ikhtiyar hota hai

hai haqiqat yahi ki har chehra
dil ka aaina-dar hota hai

ai mere dil sukun sukun hai magar
intishaar intishaar hota hai

ras aati nahin khushi us ko
jis ko gham nagawar hota hai

sun ke 'ajiz' wo sar-guzasht meri
jaane kyun ashk-bar hota hai