sanson ki rawani mein khalal aane laga hai
thahro ki bichhad jaane ka pal aane laga hai

kahte ho to lahje ki kamar sidhi na kar lun
mana ki mere ijz pe phal aane laga hai

ye kya ki har ek waqt ki bezar samaat
har lafz ki peshani pe bal aane laga hai

lao meri aawaz ki dastar utha kar
kam-zarf koi had se nikal aane laga hai

lo khatm hui umr-e-mah-o-sal ki ginti
tamhid thi jis ki wahi kal aane laga hai