sar-ba-sar pyas mein duba nazar aata hai mujhe jis jagah bhi koi dariya nazar aata hai mujhe jam-e-jam se bhi siwa hai ye mera jam-e-sifal kya kahun is mein bhi kya kya nazar aata hai mujhe kya banega meri aankhon ka mere shishagaro jo yahan jaisa hai waisa nazar aata hai mujhe koi dekhe to dikhaun use manzar ka maal koi puchhe to kahun kya nazar aata hai mujhe kabhi hota tha jo 'ghaalib' ke muqabil shab-o-roz raat-din ab wo tamasha nazar aata hai mujhe