sar-burida koi lashkar nahin dekha jata
hum se ye zulm ka manzar nahin dekha jata

apni aankhon ko yahi kah ke sula deta hun
apni auqat se badh kar nahin dekha jata

apne kandhon pe utha lete hain lasha apna
bojh apna kisi sar par nahin dekha jata

dekhne ko to use bar nahin hai mujh ko
baat ye hai ki barabar nahin dekha jata

lautna ho to un aankhon se kinara kar lo
dubna ho to samundar nahin dekha jata

aaina hun na chura mujh se tu nazren apni
dekh aaine se bahar nahin dekha jata

hum bure hain to koi baat nahin hai 'iqrar'
un se to koi sukhan-war nahin dekha jata