sar-e-khayal hai ye kaun magar nahin hun main
jidhar talash rahe ho udhar nahin hun main

ye taur-e-justuju thoda badal ke dekho na
main aur bhi hun bahut jism-bhar nahin hun main

ye kis ki shakl meri zat par numayan hai
meri tarah tu lage hain magar nahin hun main

thakan safar ko samete hue ho panw mein
ye aur baat ke zer-e-safar nahin hun main

main sochta hun ki ab ishq hi karun tujh se
bahut dinon se kisi kaam par nahin hun main

shab-e-jawani hun aisa na ho guzar jaun
so mujh ko ji lo ki phir umr-bhar nahin hun main