sarzamin-e-zulf mein kya dil thikane lag gaya
ek musafir tha sar-e-manzil thikane lag gaya

gulshan-e-hasti nahin ja-e-shaguftan ai saba
dekh jo ghuncha gaya yan khil thikane lag gaya

aabru rakh li khuda ne us ki ham-chashmon mein aah
tegh-e-abru ka teri ghael thikane lag gaya

fursat-e-yak-dam pe phula tha hubab-e-ab-ju
tha jo naqsh-e-safha-e-baatil thikane lag gaya

jaan-e-shirin di tere aashiq ne bhi jun kohkan
sar se apne mar kar ek sil thikane lag gaya

rakh qadam hoshyar ho kar ishq ki manzil mein aah
jo hua is rah mein ghafil thikane lag gaya

chhanw mein nakhl-e-mizha ki lotta hai tifl-e-ashk
khak mein ya rafta rafta mil thikane lag gaya

aashna koi na dekha gharq-e-bahr-e-ishq ka
ek dam mein jo tah-e-sahil thikane lag gaya

be-kali kyunkar na howe us ki furqat mein 'nasir'
ishq mein us gul-badan ke dil thikane lag gaya