sath-e-pas-e-darun nae naqsh laiye
mujh ko mere mizaj se behtar banaiye

hukm-e-ghani se aae to hum aa chuke bahut
lafzon pe iltimas ki khushbu lagaiye

apni ana pe zulm na kije musafirin
kah kyon rahe hain aap ki jate hain jaiye

gham panchhiyo main aap ki umda khurak hun
ai dushmano please mujhe noch khaiye

bahr-e-umid-e-qurb main khud wasl ho chuka
kitne hi ab firaq ke qisse sunaiye

pathra chuka hai aap ke aane ka rasta
palken bichhaiye ki ab aankhen bichhaiye