sath un ke mere arman ka jaana thahra
un ka aana tha meri jaan ka jaana thahra

sath us ke jo kisi aur ko kar lun main sharik
ek laghzish se hi iman ka jaana thahra

khauf allah ka jis qalb ki zinat ho miyan
aise dil mein kahan shaitan ka jaana thahra

jab wali ne kiya inkar mahal jaane se
un ke dar par bhi to sultan ka jaana thahra

jis ki ima pe nikala gaya jannat se mujhe
us ki marzi se hi insan ka jaana thahra

sar pe gathri hai gunahon ki bhula kar 'mahshar'
kaise kah dun ki badi shan ka jaana thahra