sawal tujh se shab-o-roz mera chalta raha
jawab tera hawaon mein mujh ko milta raha

falak pe chand sitaron ka karwan bhi bujha
tumhaari yaad ka lekin charagh jalta raha

qarib-e-marg jo dekha to pas koi na tha
tamam umr ye phir kaun sath chalta raha

bala ke habs mein sari zamin sukh gai
magar ye pyar ka pauda tha phir bhi phalta raha

main bewafa bhi kahun kis tarah tujhe jaanan
tu ban ke baad-e-saba roz mujh se milta raha

main e'tibar mohabbat ka teri kya karta
bayan tera to har roz hi badalta raha

rafu main karta bhi 'aijaz' kaise zakhmon ko
zaban ka zakhm tha ye guftugu se silta raha