saya kiye hue tha jo baadal nahin raha
aafat ka ye mehr magar dhal nahin raha

sar par thi us ki chhanw to maujud the hawas
pagla gae hain hum ki wo aanchal nahin raha

jiwan ki shahrah ko raushan kiye hue
ek hi to qumquma tha jo ab jal nahin raha

ek khub-ru parinda badi dur ja basa
ab khwahishon ka bagh mukammal nahin raha

thahre hue the hum to chale ja raha tha waqt
jab sath chal diye hain to ab chal nahin raha

dekha to us taraf koi maujud hi na tha
jab darmiyan khauf ka daldal nahin raha

mere takhaiyyulat ne jadu sa kar diya
wo samne na ho ke bhi ojhal nahin raha