shab-e-firaq se manus-e-gham ka mara hun
ubharta chand nahin dubta sitara hun

zamane walo agar ho sake to rahm karo
meri hansi na udao main be-sahaara hun

nawazo dar-o-rasan se ki khaal khinchwao
bas ek bar ye kah do ki main tumhaara hun

milega mera taaruf kahan kitabon mein
main ahl-e-dard ke chehron se aashkara hun

wo jis se pai hai tanwir chand suraj ne
main us ke ishq mein 'ghamgin' dil ko haara hun