tere gham ke shikar hain hum log
phir bhi tujh par nisar hain hum log

hum se puchho maal-e-lala-o-gul
kushtagan-e-bahaar hain hum log

jis ko sun kar falak laraz utthe
wo fughan wo pukar hain hum log

kal nasim-e-sahar ka jhonka the
aaj gard-o-ghubar hain hum log

zindagi ko khabar nahin lekin
zindagi ka waqar hain hum log

hum se bhi be-rukhi are tauba
aap ke raazdar hain hum log

jaane kya raaz hai ye ai 'ghamgin'
jaane kyon be-qarar hain hum log